Gusto kong humabi ng mga kataga
Na tulad ng mga patak ng ulan
nabubuo sa iisang hibla
Dumadaloy ng dahan dahan
O minsan kalimitan rumaragasa
Mapusok
Mapangahas

Gusto kong ihabi ang bawat patak
na sasaluhin ng punit punit kong bubong
o bawat patak na walang kiming
darating sa mga araw
na hinahanap kita

Sa mga araw na dapat
kasama kita

Subalit maluwag sa loob
Na ihabi ang mga ito
Na nasa malayo ka at hinahabi rin ang sarili mo

Pagkat ako rin sa ngayon
Pinagtatagpitagpi ang mga bagay
Na maghahatid sa akin bukas
At sa susunod pa

Upang kung magbibigay man ako
ng aking sarili
sayo
tagpi tagpi man
subalit buo