Pinaghehele kita
habang halos katabi ko ang mga bituin
habang halos abot ang mga tinitingalang kislap ng bawat isa nito
kung naririnig mo ang himig
at kung nararamdaman mo ang halik ng alipin kong hangin
ang lahat ng yan ay inutos ng pagmamahal ko sayo
hahanapin ka nya
at ipaghehele

kagaya ng paghele ko sa nananabik kong damdamin
na sana hawak ko ang kamay mo

habang nasa kawalan ng malawak na langit
na sana nakahiga akong natititigan ang iyong mukha

habang pinapatay ang oras sa isang dayuhang lugar
na sana ang bawat pitik nitong utak ay nararamdaman mo

dahil isang libo’t isang ulit kitang
iniisip
minamahal
sa bawat sandali ng
pananabik


Ramdam ko ang pagduyan
ng lulan mong hangin
at paglalakbay ng iyong diwa at pag-ibig
nasalo ko ang bawat mong halik
sinalubong ang mga yakap
at yapos ng iyong awit
nakipaglaro sa hangin
ng iyong halinghing
at sa paghupa ng paglalakbay
ay humimlay sa dibdib ng langit

sa tabi ng mga bituin ako’y pinaghele
ng bawat tibok
bawat pintig ng iyong pananabik
ramdam ko ito at walang magawa
kundi matulog ng mahimbing
at muling salubungin
ang bugso ng iyong pag-ibig.